ನೆನಪು

ನಿನ್ನ ನೆನಪೇ ಹಾಗೆ,
ಮುಂಜಾನೆಯ ಮಂಜಿನ ಮುಸುಕಿನ ಹಾಗೆ,
ಇರುಳಲಿ ಕಾಡುವ ಕನಸಿನ ಹಾಗೆ,
ಚಿಗುರೆಲೆಯ ಅಪ್ಪಿದ ಇಬ್ಬನಿಯ ಹಾಗೆ,
ಮೊದಲ ಮಳೆಯು ಇಳೆಯ ಚುಂಬಿಸಿದ ಹಾಗೆ;
ಆ ಸವಿಚುಂಬನಕಾಗಿ  ಹಾತೊರೆವ ನವಿಲಂತೆ ನಾನು
ನೀ ಬರುವ ಹಾದಿಯ ಕಾದಿರುವೆ, ಗರಿಬಿಚ್ಚಿ
ತಂಗಾಳಿಯ ಅಲೆದಾಟಕೆ ಮುಂಗುರುಳು ನಲಿದಾಡುವಾಗ,
ಎಲ್ಲೋ ಮರೆತ ಪಲ್ಲವಿಯ ಗುನುಗುನಿಸುವಾಗ,
ಸ್ಮೃತಿಪಟಲದೊಳಡಗಿದ ಭಾವಗಳ ಹೆಕ್ಕಿ ತರುವಾಗ,
ನಿನ್ನ ಅಸ್ತಿತ್ವದ, ನಿನ್ನ ಸಾಮೀಪ್ಯದ, ಆ ನಿನ್ನ ಸಾನಿಧ್ಯದ ನೆನಪು.
ಚುಮುಚುಮು ಚಳಿಯಲಿ ಬೆಚ್ಚಗಿನ ಅನುಭವ
ತಪಸ್ವಿನಿಯ ತಪೋಗಾಥೆಯಂಥ ಅನುಭಾವ:
ಬಾಗಿಲೊಳು ನಳನಳಿಸಿಹ  ಹಸಿರು ತೋರಣ
ಕೂಗಿ ಕರೆದಿದೆ ನಿನ್ನ, ಬರುವೆ ಎಂದೋ ನೀನು?
ನನ್ನ ಮನವ ತುಂಬಲು, ನನ್ನೆದೆಯ ಮನೆಯ ತುಂಬಲು
ಕಾಯುತಿದೆ ಜೀವ, ಆಸೆಯೆಂಬ ಹೊರೆಯ ಹೊತ್ತು
ಕಾಡಬೇಡ ಇನ್ನು, ಒಮ್ಮೆ ಬಂದು ಬಿಡು
ಕನಸಿನಲ್ಲಾದರೂ  ಬಂದು ನನ್ನ ಜೊತೆಗೂಡು...